وبحب الناس الرايقة!!!

احم احم,,,
ياللي هنا,ياساتر...
دستور ياخونا
_النهاردة الجو حار أوي ورجلي ورمت بقت شبه البوتجاز من كتر المشي وجزمتي اه ياجزمتي ياحبيبتي مكنش يومك ياجديدة دوبتِ ورحتِ في شربة ميه من كتر الهري والنكت رايحة,جاية اسعى على رزقي, وفأجة يعني وفجأة لساني دلدل وعيني اترسم فيها علامة الدولار زي كده لما توم يشوف جيري ,ده كله لما شفتها ولمحتها يااااااه معقولة الجمال ده شعقولة خالث!!!
شوفت خير اللهم اجعله خير كوباية عصير مشبرة,يازلام ياهيام أنتِ وإلهام على دي كوباية عصير تروي الظمأن بصحيح ,,
محدش يسألني من هيام ولا إلهام؟

,انا هقول لوحدي دول الهس هس ملناش دعوة احم عدوها هى جات على دي يعني....
ما علينا قلت لما أروح أبر نفسي وأمنجها بكوباية عصير قصب من اللي هى من عند برعي يلا ان شا الله ما حد حوش مش خسارة فيا كوباية عصير ب75 قرش ما  هي خربانة خربانة
دخلت المحل وطلبت الكوباية وفاتت دقيقة وفاتت دقايق وفاتت وراها دقايق تضايق وفين انتِ فين ياكوباية العصير وفين انتِ فين من لهفتي قربت ادق عصافير أهو وصلت " أهو جالك أهو العصير أهو" وروحت فاقعة زغرودة ولا زغرودة أم ابتسام على فكرة ام ابتسام دي تقرب لهيام وألهام"هووووش"...
ما علينا أخدت كوباية العصير بين إيديا وهجمت عليها ولا دراكولا لما يجي يمص دم ضحاياه ونزلت عليها هتتك بتتك ,يازلااااام فعلا على الإنتعاش ولا تقولي سبرايت ولا فانتا لوب ,وفجأة طرطأت وداني وسمعت أغنية وبحب الناس الرايقة اللي بتضحك علطول وانسجمت مع الأغنية وبدأت أغني معاها بصوتي الرائع "أحم" .!
ركزت شوية مع كلماتها وضربت عيني لأخر الشارع أدور على الناس الرايقة المنتعشة اللي رامي عياش وعدوية عمالين يلتوا ويعجنوا في سيرتهم .
ياسنة سوخة ياولاد مفيش حد في الشارع خالص مبين سنانه البيضة الحلوة دي كله قاضب حواجبه زي قضبان القطارات اللي كل يوم بتدخل في بعضها, والكل قافل شفايفه بصمغ ومش أي صمغ ده صمغ أمير ياساتر ياساتر
!!!!
واحد ماشي يكلم نفسه والتاني ماشي يأفأف ويقول هو يوم باين من أوله ,والتالت ماشي يقول استغفر الله العظيم ياعم انت حاسب ولا علشان عندك عربية هتدوس على بقية الخلق اللي أداك يدينا ياسيدي , وبايعة الفل (تشتري فل ياهانم فل يابيه فل ياأستاذ والنعمة أخويا ما أكل من سنة 1990 ,

والانسة الشيك دي بتصرخ في واحد عجوز "أنت ياعم أنت مش تفتح هتخبط فيها"
_اسف يابنتي
_اسف ايه مش عندك عينين زينا ولا دول رجل كنبة
ياباااااااااي هى الناس جرالها ايه حضرتك طيب فين بقى الناس الرايقة اللي بتضحك علطول
تقريبا ذهبوا مع الريح
يلا محدش واخد منها حاجة أهم حاجة اننا ننام ونستوريح ونشد اللحاف والبطانية ومننساش المخدة!!!

دكتور نفساني حضرتك

أحم ,أحم... 

على فكرة الحالة اللي أنت فيها تستدعي إنك تروح لدكتور نفساني 

نعم!!!! 

دكتور نفساني ليه هو أنا اتجننت خلاص 

.............. 

أكيد,أكيد هيكون ده  رد فعلك لما حد ينصحك إن تروح لدكتور نفساني 

ليه بيتصور لنا إن اللي عقلهم ترالالي هما اللي بيروحوا للدكتور النفساني؟ 

طيب ليه لما نسمع ان حد زار اللهم احفظنا الدكتور النفساني :d

بنحاول نبعد عنه بقدر المستطاع ؟ 

ليه بنعتبره كإنه شاذ عن القاعدة, بنعتبره مش مننا من المتحولين اللي عينيهم بتحمر بليل وبيمصوا في دم الغلابة :( 

مع إن أغلبنا ,ده إذا مكنش كلنا محتاجين فعلا نعمل زيارة للدكتور النفساني شهريا ده لو مكنش أسبوعيا 

ما هو اللي الواحد بيشوفوا في الدنيا دي مش قليل 

خناق وزعيق وزحمة وميه مقطوعة واللحمة, ياااااه فاكرين اللحمة بقالنا زمان مشفنهاش 

وحشتنا ريحتها, سايبة فراغ كبير في حياتنا بنت الإيه "يلا دنيا ومبدومش" 

طيب نعدي ده كله وياعيني على بناتك ياأم الخير اللي واقفين في طابور العنوسة 

المفروض إن الطابور يقل واحدة تخرج والتانية تدخل مكانها 

لاااااااااااا, طابور العنوسة من الثوابت مبيتغرش 

لأ لأ لأ ده كلام ثوابت ايه , ياريته كان من الثوابت , ده دوال متغيرة لكن في زيادة مستمرة 

عامل زي العشوائيات كده وعامل زي توك توك العاصمة يتوغل وينتشر 

عين وصابتنا والله , حسرة علينا ياحسرة علينا 

وهى دنيا وبتمرمرط فينا ومحدش بياكلها بالساهل ومش عايزنا بعد ده كله نروح لدكتور نفساني 

ده المفروض يعملوا لنا عرض جديد " دكتور نفساني ومعاه كتب

فرويد في علم النفس هدية ويوجد لدينا خدمة توصيل للمنازل" 

متخدوش في بالكم وأهم حاجة إن إحنا ننام ونستوريح ونشد الحاف والبطانية ومننساش المخدة

الموت (حالة توهان)

الموت,عندما نسمع تلك الكلمة ينتابنا شعور غريب(شعور بالخوف)
بس ياترى خوف من مواجهته,ولا من سَكراته,ولا من نهايته,ولا من لقاء ربنا.
تراودني فكرة الموت كثيرا تلك الأيام.بل أشتم رائحة الموت في كل شئ(الأكل,الشرب,الهوا,حتى الزهور أصبحت برائحة الموت)
ولا أعلم السبب وراء كل هذا.
ياترى لأن ذكرى وفاة والدي كانت يوم 7/7,ولا ياترى بسبب وفاة ثلاث شباب في حوداث مختلفة.
ياترى هل ذلك فعلا السبب في أنني أفكر في الموت كثيرا في هذه الأيام ولا يمكن زي ما بنسمع (أن اللي هيموت بيحس قبل ما
يموت أنه........)
*************
حالة توهان,فكرة تشاؤمية, حالة مزاجية غريبة
طيب ليه لما قلت لماما (حاسة أني هموت) ردت وقالت
(بعد الشر يابنتي).
هو الموت شر؟!!!!
طيب ليه لما بيتولد طفل بنفرح ولما بيموت شخص بنحزن؟!!!
هي الدنيا للدرجة دي مفرحة, والموت للدرجة دي بيزعل
وهل معني أن الشخص مات يعني مش هنشوفه تاني؟!!!
طيب ما هو بابا مات. بس حاسة أنه لسه عايش,عايش معانا بروحه,عايش في صوره اللي محتفظة بيهم وبالذات الصورة اللي كان شايلني فيها وأنا عندي شهر
على فكرة أنا لحد دلوقتي بكلمه.

آه بكلم بابا وبشتكيله كمان لما بكون زعلانة وبحس أنه سامعني وبقوله كل حاجة كأنه موجود
بالظبط ما هو فعلا عايش معايا
هو اللي حببني أني أكتب وأتعلمت على أيديه عبارة(مصر هبة النيل) لما كتبهالي في موضوع التعبير. وفاكرة لما كنت في خامسة ابتدائي وكان بابا موجه الرياضيات وكتب مسألة صعبة جدا على السبورة وطلب مني أحلها ومعرفتش طبعا فضربني
قلم لا يمكن أنساه أبدا وكل ما أفتكره أضحك وافتكر العبارة اللي
قالهالي يومها(أزاى بنت موجه رياضيات متعرفش تحل مسألة زي دي) ومن يومها عقلي بقى آلة حاسبة
هتفضل عايش معايا علطول ياأغلى أب موت ايه اللي هيخدك مني.
وان شاء الله هكون معاك قريبا
(يوم,شهر,سنة,10 سنين) الله أعلم
مش مهم المدة كام,كلها أيام وهتمر
ومفيش أقصر من الأيام!!!!

ليه خايف من الموت
ليه عايش في توهان وسكوت
ليه يابني معملتش حسابه
دي كلها أيام وهتفوت

وأهم حاجة إننا ننام ونستوريح , ما هو محدش واخد منها حاجة 

شد اللحاف والبطانية ومتنساش المخدة!!!!

ذاكرة ممتلئة "full memory

فجأة وبدون مقدمات قررت أرجع ليهم من تاني مش عارفة ليه مع ان نويت اني عمري ما هفكر فيهم وهعملهم ديليت نهائيا من حياتي لإنهم سبب إزعاج كبير وصداع مزمن رجعت مسكتهم تاني مع ان كسرته ميت مليون حتة وقطعتها وفتفتها نهائيا
, فجأة حسيت بحنين غريب تجاهم "وحشوني"
لاقيتهم هما الوحيدين اللي بيحسوا بيا , بيعبروا عني بيشركوني همومي مفيش غيرهم في حياتي اللي بحب افضفض ليهم
رجعت لهم وحاولت استسمحهم انهم يسامحوني لكن ازاي هعوض اللي عملتوا فيهم
ليه اتسرعت ؟!!!!
لاقتها ردت عليا وقالت" هى عادتك ولا هتشتريها"
ابتسمت وقلت لها وحشتيني جدا يا" نوت بوك يالمضة أنتِ" ,
"والتفت إليه وقلت له انا اسفه ياقلمي العزيز ولكن ابتسامتي كلها تعب وتشاؤم وخوف وقلق ,أحاسيس متظربه
ياترى ده كله ليه ياسارة ؟
ده كله علشان)( 4/2)(قرب
ده كله لان عمرك هيزيد سنة كمان طيب وايه يعني عادي
لأ مش عادي, عادي بالنسبة للناس العاديين , لكن ليكِ انتي مش عادي
عارفة يعني ايه سنة جديدة
يعني ألم وجرح , كدب وخداع رصيد من تزييف المشاعر هينضاف لحسابك اللي بقى مليان على اخره
زي (((دولاب مليان هدوم)))
سنة جديدة متعرفهاش , ومش عارفة ايه اللي جايباه معاها ليكِ
سنة جديدة ممكن تودع فيها ناس قريبين منك من تاني
سنة جديدة هتسمعي فيهما كلام من ناس حقوديين بيمثلوا الحب امامك لكن من وراكِ حاجة تانية
سنة جديدة هتشوفي فيها أيام ممطرة كليالي الشتة القارس
سنة جديدة فيها حياتك هتكون زي أوارق الشجر في ليل الخريف
" مش حابها السنة الجديدة من عمري , مش علشان كبرت لأ خالص
ومش علشان السنة اللي فاتت كانت كالسراب بالنسبة ليا
بردو لأ خالص
لكن لإن الذاكرة امتلأت بقت memory full" "
لازم امسح حاجة من القديم علشان استقبل مسجات جديدة
وأنا بصراحة مش محتاجة مسجات جديدة
يكفيني القديم,,,
يكفيني اني اغمض عيوني للحظات واشوف نفسي وانا في المدرسة في وسط الأزهار بلعب وبجري
يكفيني ان اتزلحق على المرجيحة في الفسحة
يكفيني فرحتي بهدوم العيد
يكفيني حضن من أبويا
يكفيني دفتري ذكرياتي "الأتوجراف"
" اللي مليان بتهاني رقيقة بريئة من أصحاب الطفولة وعبارات بعيدة عن التكلف والتسلط والخداع
" اكتب لكِ وانا على الشط واسمع انغام البط وبأحلى خط"
"أكتب لكِ بالقلم الرصاص ياأعز الناس"
"أكتب لك ِباللون الأحمر دليل على الحب الأكبر"
أكتب لكِ على شجر الليمون ياأغلى ما رأت العيون" "
يكفيني أحلى ذكريات
يا ترى ممكن ارجع للبراءة بتاعة زمان
طفلة بريئة في حضن الايام بعيدا عن تغيرات الزمن
(حالة مشوشة اخرى)
ولا عزاء للسنة الجديدة!!!! 
أهم حاجة إنك تنام وتستوريح وشد اللحاف والبطانية 
وبليز ,بليز متنساش المخدة

السلام هو أول الكلام

السلام عليكم يابشر,,, 

من فينا مش مضايق , من فينا مش طهقان 

وعلى رأي الأستاذ العالمي ريكو " طهقان مخنوق مضايق , قرفان زهقان مش رايق" 

هى دي طبيعة الدنيا وهى دي الحياة 

واللي مش عجبه 

يخبط راسه في الحيط ويقول يارتني ما جيت 

بس مش بإيدينا , ولا من فينا بيختار 

وعلشان مش نحتار 

خلينا نعيش بإستهتار 

نعم,, ايه قولتولي بإستهتار ازاي انا هقول لكم على الطريقة واسمعوا الحكمة من ...... 

أحم , أحم 

أوعى حد يكمل , انا بهدد على فكرة 

أقصد اسمعوا الحكمة من سارة زينة الحارة 

عيشوا بإستهتار 

يعني عيشوا بلامبالاة علشان تضمنوا تبعدوا عن امراض الضغط والسكر والذي منه ,,, 

يعني لما تصحى الصبح وتدخل التواليت علشان تعمل حاجة كل الناس بتعملها امر طبيعي وفطري عادي يعني 

تلاقي الميه مقطوعة , تبتسم وتقول وماله أكيد بتحصل كتير!!!! 

لما تخرج من التواليت وأخوك يدخل يلاقي الميه رجعت عادي عادي ابتسم!!! 

لما تنزل الشارع وتفضل واقف 7 ساعات علشان تلحق مكان في الاتوبيسات المكيفة 

ولا علشان تلحق الدرجة الأولى الفخمة في المترو وبعد ده كله متلقيش مكان ابتسم, 

وبعد كده توصل الشغل وانت في كامل أناقتك , لاطرطشت عليك شوية ميه مجاري من عربية سايقاها هانم من الهوانم 

ولا طفل برئ داس على رجلك وانت ماشي " طفل لذيذ يعني من اللي بالي بالكوا" لأ خالص 

ولا الكمسري عدي عليك وانت واقف في الاتوبيس خمسين مرة رايح جاي 

ولا سواق التاكسي كان نفسه يدوس عليك بالأربع عجلات , ايه اللي خلاك  تضطر في الآخر تركبه مش كده استهتار وبكده ضيعت الماهية في الاجرة مش مهم. المهم انك توصل في كامل أناقتك "ابتسم"!!!! 

لأ وبعد ده كله مديرك يبقابلك بإبتسامة حانية رقيقة كلها حنية ومش عايز بعد ده كله تبتسم ,ايه ياأخي هتتبطر على النعمة 

ابتسم

ابتسم وعيش ببرود , ابتسم وعيش بلا مبالاة 

ابتسم واتغطى ببطانية ولحاف ومتنساش المخدة!!!!! 

وابتدأت الحدوتة, حلوة ولا ملتوتة